مر بيه بحر تلكاني الك طوفان
اشيل كل هموم البيك واحزانك
مربيه صبر تلكاني الك ايوب
خل تاكل عوافي بجسمي ديدانك
مر بيه طفل تلكاني الك كاروك
الي طايع يظل كل وكته اعنانك
مر بيه عشك حب وشوك
وظل احجيلك شما تطول ازمانك
مر بيه دمع تلكاني خوش عيون
اكت كت المطر لو طال هجرانك
مر بيه كلب ماينسه طاري الشوك
ولا يخطر ابد عالبال نسيانك
مر بيه كلب تلكاني اطيب كاع
ومن دمع المحبه تخضر اغصانك
مر بيه ورد تلكاني الك بستان
يظل عطرك يفوح وتسحر الوانك
مر بيه لحن تلكاني عود وناي
وخل تتسله روحي باعذب الحانك
مر بيه سهر تلكاني شمعة ليل
افرح من تظل تحركني نيرانك
مر بيه دوه تلكاني حفنه جروح
اشيلك عذابي بسبب حرمانك
مر بيه درب تلكاني ضايع بيك
صار سنين ادور وين عنوانك
مر بيه فرح تلكاني حنه وياس
احني جفوني واطبعهه اعله بيبانك
مر بيه سهم تلكاني الك نيشان
صوبني وابد لاتخطي نيشانك
مر بيه كبل لايمر بيه الموت
هنيالي اموت بين احضانك
كلبي تحمل بحبك عذاب وضيم
خنته هواي لكن كلبي ماخانك
مر بيه تره توسلت بيك هواي
شعندك من كلب ياربي سبحانك
اتمنى ان تعجبكم .... اوراق الخريف
الإثنين مارس 02, 2009 10:31 am
