الحـــــــــــــــــــــب الحـــــــــــــــــــزين
ليش قلبج يابعد عمري حزين
ليش قلبج يا بعد عمري حزين
والله مب لايق عليج هذا الزعل
يا حلاتج يوم انتي تضحكين
افتحي قلبج وقولي وش حصل
من تجرأ من قطف هالياسمين
من حرم هالزين قبل لا يكتمل
من كسر قلبه وشعوره بكلمتين
ويدري قلبه للعتب ما يحتمل
منهو ارخص قيمة الغالي الثمين
ويدري انه في عيوني له محل
ومن يقول الحب ما يقطر حنين
ومن يقول انه وسط قلبي ذبل
يالله قومي يالله لا تتكيسلين
خلي حلمي وياج يوصل لي زحل
يالله قومي يالله لا تتشاورين
خلي حبنا يكون للعالم مثل
قالت اصبر .. قلت انتي تامرين
وطالعتني بعين يملاها الوجل
ولا اراديا .. ذرفت دمعتين
وقالت ان الزين ابد ما يكتمل
قلت قولي لي ترى سرج دفين
ما بخبر حد لو مهما حصل
بس دخيلج ما ابي هالدمع يبين
مب عشان شي بس والله ما احتمل
طالعتني وقلت لها شــ تطالعين
ما في داعي للعواطف والخجل
هذا مب وقته في ويهي تسرحين
جاوبي احساس قلبي اللي سأل
قالت الشدة بعد فترة تلين
والفرح يقبل اذا باقي أمل
والشقا لازم في يوم انه يهين
والصعب ياتيه وقت يكون سهل
قلت لها قولي لي ولا تلمحين
ما احب اسمع كلام به جدل
قولي شـ الموضوع اذا انج تسمحين
وخلي الخوف اللي فيني يرتحل
قالت اهلي ساوموني بدرهمين
وقررو انهم يزوجوني بعجل
يا خطبني شخص بعمري مرتين
ويابو المأذون والعقد اكتمل
وافقوا لأنهم فـ ماله طامعين
وبالتجارة والمراكز والفلل
ليش لا دام انهم اللي رابحين
يمكن انهم يطلعون بكم محل
قالت الحقني الحقني ومد لي هاليدين
ضاع فكري وطار من راسي العقل
من لي غيرك اشتكي له يا الظنبين
عطني رايك عطني لو ذرة أمل
صرت انا وياك ظمن التايهين
والحزن في دربنا توه استهل
ليش يا دنيا في ويهي تعبسين
حظي المايل متى بس يعتدل
قالت اتكلم ولو بس جملتين
لا اتم ساكت ترى وردي ذبل
قول لي اي شي قول لو بس كلمتين
وانت بس اللي لأمره أمتثل
صدمتي كانت معاها صدمتين
صدمتي كانت في هالمرة دبل
كنت بسألها اش رايج تملجين
دام خذنا الدبلة والحب اكتمل
ما نطقت بشي وانا ميت حزين
والدمع من فوق وجناتي همل
قمت اشاهق ما ابي نوحي يبين
جني خيل بأعلى صرخاته صهل
قمنا نطالع بعض عين بعين
ما تكلمنا إلين الليل حل
قالت انطق لا تقول انزين انزين
وانا ساكت والفرح عني رحل
كنت اظن احنا لبعضنا مكملين
ما دريت الحظ عاند بالفعل
كنت انا وحدي في عالمها سجين
وكنت اقول الحظ اخيرا اعتدل
قلت لها اذكر كلامج لين الحين
يوم تقولي لي تراك احسن ريل
صحت فجأه وقلت لها تتذكرين
يوم كنا نخطط لشهر العسل
قلت عشاني قومي ولا تزعلين
وارضي بالواقع مدام انه حصل
اسمج بيبقى وسط قلبي دفين
والقمر لازم في يوم بيكتمل
والله بفرح دام انتي بتفرحين
يالله خلينا بعرسج نحتفل
واصفعتني كف عالخد والجبين
وقالت انت قاعد تكلم طفل ؟
قلت لها وصوتي بنبراته حزين
اوعديني هالزعل آخر زعل
لان قلبج ينعرف يوم تزعلين
والله مب لايق عليج هذا الزعل
ومهما ناديتج ابد لا تجاوبين
قصه الحب انتهت .. مات البطل !!
افترقنا بعد كل هذي السنين
وللأسف حبنا في هالمرة فشل
انتهى مشوار احلى عاشقين
كلن بدربة ولاكن ما وصل
كل واحد ينسى مع مر السنين
لاكن الذكرى امرها مب سهل
لين آخر يوم في عيني تسكنين
لين آخر يوم في قلبي تسكنين
لين آخر يوم في روحي تسكنين
وصورتج تبقى مثل بدر اكتمل
في بعض الاوقات اقعد مستكين
بس افكر لين يذبحني الملل
بالفعل قطفوا زهور الياسمين
وســــــــــــــــــــــــــلامتكم ..
الثلاثاء ديسمبر 02, 2008 7:36 pm
